سلسلة المساعده في شراء المكياج ( الجزء الاول ) + شرح معنى الاندرتون ومعرفة الفرق بين البشرآت ♥

سسسلآم يآ حلوآت .. ♥

كيفكم جميعاً يآرب تكونوآ بخير .. ♥

كثييير بنآت يسألوني سواء على انستقرام او على سناب شات:

" انا عروسة انصحيني بفاونديشن حلو ويناسب بشرتي "

" انا حنطية أنصحيني بلون فاونديشن مناسبني "

" انا برونزية انصحيني بالوان ارواج تناسبني "

" انا بشرتي مره فاتحه انصحيني بالوان بلشرات حلوه علي "

ووووو كثير أسئلة تجيني نفس هآلنوع من الأسئله وفي الغالب تكون عن الفاونديشنز أو باودرز الوجه ..

وبهذا هنآ انتوآ ترتكبوآ أكبر خطأ لمن تسألوآ أي أحد عن هذآ الموضوع ..

في السلسله هذي اللي راح اعملها راح تنفع كل " عروسه " حابه تتجهز لزواجها ..

او كل " بنوته " م عندها ميك اب وحابه انها تشتري ميك اب جديد ..

.

.

.

قبل أي حآجة وقبل كل حآجة ..

حطي في بآلك عدة أمور يجب مرآعآتهآ في وقت شرآء الميك آب :

أولاً: ذوقك الخآص

ثانياً: الأندرتون المنآسب لك وبالتآلي الألوآن المنآسبة

ثآلثاً: ميزآنيتك 

خلونآ نبدأ فيهآ نقطة نقطة ونتكلم بكل فقرة على حدى ..

أولاً: ذوقك الخآص:

المقصد بذوقك الخآص أنو أنتي ما تشتري حآجآت أنتي م تحبي تحطيهآ أو حاجات ما راح تستخدميها نهائياً ..

مثلاً انتي ذوقك في الميك اب ما يتعدى الايلاينر والروج ..

او انتي ما تحبي تحطي شي اكثر من ماسكرا وغلوس ..

او فرضا ما تحبي تحطي شي غير الفاونديشن وباودر للحاجب وروج مع بلاشر خفيف ..

وهكذا كل الموضوع يعتمد على ذوقك انتي ايش تحبي وايش ما تحبي تسوي ؟

بحياتك لا تفكري تشتري شي وتقولي راح استخدمه بيوم من الايام .. ابدا ما انصحك ..

لانه راح يركن بالدرج وما راح تسوين فيه ولا حاجة نهائيا ..

ثانياً: وهو اكثر شيء مهم في كل الموضوع .. وهو الاندرتون ..

الاندرتون المقصود فيه هو لون الجلد التحتي .. او لون الجلد الاساسي .. 

بمعنى ان رغم اختلاف الوان البشر ودرجاتها الا ان في الوان اساسيه ترجع لها البشرات او هي اصل البشرات ..

وتنصف حسب الالوان الى :

- الوان دافئة

- الوان باردة

- الوان معتدله

الالوان الدافئة في الغالب تعود الى اللون الابيض، الاصفر، الاخضر، البرتقالي، الاحمر و...إلخ 

الالوان الباردة في الغالب تعود الى اللون الاسود، الازرق، البنفسجي، 

الوردي ... إلخ 

اما الالوان المعتدله فهي تجمع مابين الالوان البارده والالوان الدافئة

هذي الصور هنا تحدد الالوان الدافئة والالوان البارده ..

وبحسب ذلك تختلف البشرات وتختلف درجاتها والوانها ..

يعني بالامكان تلاقي 2 بنات الوان مثلا فاتح و بشراتهم مره تتشابه ..

ولكن!

الفرق بأن الاولى لون بشرتها دافي .. والثانيه لون بشرتها بارد ..

وهذي من الامور اللي تأثر على اختياراتك لالوان ملابسك، لكريمات الاساس، لالوان خافي العيوب، ولبودرات الوجه، وحتى لارواجك 

باوريكم مثال على البشرات ..

كم وحده فيكم تتابع المسلسل التركي حب للايجار ؟ 

انا دارية ان المسلسل سخيف وما فيه قصه سنعه 

ولكن خلونا في بطلة المسلسل الممثله التركيه التشين ..

شوفوا وجهها وقولوا لي وش تحسون لمن تشوفونها ؟

انا شخصياً من الناس اللي احس اني بختنق كل ما شفت وجهها 

مو لشيء!

لكن لأن لون بشرتهآ بآرد مآئل للزرقه وهذا اشي يحسسني أني بختنق كل ما شفتهآ 

عموماً إذاً هي بشرتها مثلاً تصنف بانها بشرة بآردة فاتحه ..

طيب خلونا ناخذ مثال اخر ..

هذي العارضه رغم ان لونها اسمر او برونزي الا انه واضح مره انه باندرتون بارد .. ومايل للوردي كمان ..

فالاندرتون هنا ما يتدخل في كون لون البشره فاتح او غامق .. لان من الممكن تكوني سمراء لكن اندرتونك على وردي او على رمادي او على ازرق فيكون بالتالي بارد ..

صدقوني يا بنات ان معرفتكم للاندرتون راح تسهل عليك وتختصر لك ساعات من الحيره قدام القطع في الاسواق خاصة لو كنتي مستعجلة! ..

سواء كانت ملابس او كريمات اساس او بودرات للوجه او ظلال او او او او ..

لان لو كنتي ذات اندرتون بارد راح تناسبك الالوان البارده ولو كنتي ذات اندرتون دافي راح تناسبك الالوان الدافيه ولو كنتي ذات اندرتون معتدل راح تناسبك جميع الالوان من البارده الى الدافيه ..

وعلى فكره مو يعني ان انتي اندرتونك بارد مثلا يعني الالوان الدافيه كلها ما تنفع لك!

لا من الممكن ان الالوان كلها تناسبك سواء من الدافيه او البارده ولكن في طرق معينه وبالنسبه لي معقده وشرحها معقد في اختياراتك للالوان الدافيه الباردة وما ودي اشرح الان لان من الممكن يسبب لغط كثير..

من غير ان الموضوع مخصص فقط للي يبون يحصرون اختياراتهم وما يتعلعلون في الشراء 

شوفوا معاي هذي الصورة

صورة للمغنية الامريكية بيونسيه .. واللي في نظري من اجمل الوان البشرات السمراء 

طبعاً بيونسيه ابداً بشرتها ما تصنف لا دافيه ولا بارده

بل في الحقيقه هي من ذوات البشرات المعتدله يعني اختياراتها في الالوان لا محدوده كل شي تلبسه يطلع فيها يخقق 

لو تلاحظوا ان لونها مزيج ما بين اللون الوردي واللون الاصفر حاقه خورآفيه ♥

اخر شي بخصوص البشررات الدافئة احس هي اكثر بشرات المفترض ما تسألوا عنها لانها تنعرف على طول 

ما شاء الله تلقونها تشع من بعيد بهالة ذهبيه 

وبس والله هذي هي تقريباً كل معلوماتي عن الاندرتون واللي راح اعلمكم بالجزء الثاني كيف رراح تكتشفون الاندرتون حقكم لان طرق معرفته شوي اطول ويبي لها تفصيل اكثر ..

.

.

ثالث نقطه ضرور تحددي ميزانيتك في الشراء لان هذا الشي راح يخليك تتجهين لاماكن معينه ومحدده ومحصوره وهالشي ما راح يحيرك ابدا ..

فلو كانت ميزانيتك عاليه يعني من 1500 وفوق فبامكانك انك انتي تشترين من محلات هاي اند " مثل شانيل، ديور، جفنشي، لانكوم، ايستي لودر، غيرلان، ايف سان لوران، و...إلخ من الماركات الغاليه "

اما في حال كانت ميزانيتك بحدود اقل من 1500 ريال فانصحك تتجهين لماركات درق ستور او ماركات رخيصه مثل 

" اسنز، نكس، برجوا، سيفورا، مكياجي، ماكس فاكتور ، ديبورا، ريميل، مايبلين "

.

.

وبكذا اكون وصلت لنهاية اول موضوع لي بسلسلة شراء المكياج واللي كان مقدمه بسيطه وباذن الله بالمره الجايه اتكلم عن الماركات والانواع اكثرر واكثر ..

اتمنى تكونوا استفدتوا ..

دمتم بصحه وعافية..