التسوق الألكتروني: الدرس الأول ( أنواع المواقع الألكترونية ومتطلبات الشراء منها ) " متجدد "

السلآم عليكم والرحمه
 كيفكم بنات يا رب تكونوا كلكم بخير وصحة 
وينعاد عيدكم بالخير واليمن والبركات :$

مثل ما وعدتكم على برنامج ( سناب شات ) بإذن الله راح أبدأ من اليوم سلسلة دروس التسوق عبر الانترنت واليوم راح يكون أول درس لكم في هالمجال ..
مين فينا ما يحب التسوق عبر الأنترنت ؟
للأمانه انا من بعد ما تعلمت على التسوق أونلاين وانا ماعدت أفكر أطلع اسواق،
خاصة إني عايشه بقرية بعيدة نوعاً ما عن غالبية الأسواق والخدمات اللي تخدمني فلو احتجت حاجة لابد اطق مشوار لحتى اقدر اجيبه واشيل هم هالمشوار وبقوة ..
خاصة لو كان وقتي ضيق ومحدود وانا في حاجة لهالشي جداً ..
فالأونلاين شوبينغ للأمانه فكني من كثير مشاوير واختصر علي وقت كبير ..
وهذي أكبر ميزه فيه بغض النظر عن عيوب أخرى ..

مواقع التسوق الألكترونيه والتطبيقات تختلف من موقع لآخر من ناحية الخدمات المقدمه والمنتجات وجودتها طرق التوصيل والدفع ..
اعتبري الموقع الالكتروني حاله حال المحلات الموجوده في المولات كلهم لهم نفس السياسه تقريباً لكن الخدمه تختلف ..
بالضبط المواقع كذلك ..

المواقع بالنسبه لنا كخليجيين بشكل عام .. أو سعوديين بشكل خاص، تُقسم إلى:
- مواقع توفر خدمة الدفع عند الأستلام والتوصيل المباشر ( وغالباً تكون مواقع صينية أو مواقع خليجية )
- مواقع توفر خدمة الدفع بالفيزا او الماستر كارد وما توصل الى السعوديه مباشرة ( غالباً تكون مواقع أجنبيه امريكية بريطانية اسبانية تركية ...إلخ )
- مواقع توفر خدمة التوصيل المباشر لكن ما توفر خدمة الدفع عند الاستلام 
- مواقع لا تقبل التوصيل المباشر ولا الفيزا السعودية

النوع الأول مار اح تحتاجي للتسوق منه غير :
اكاونت بالموقع نفسه + عنوانج تنزليه في الأكاونت هذا وكان الله غفوراً رحيما ..

النوع الثاني غالباً راح تحتاجي إلى:
- فيزا
- عنوان بريد وهمي 

اما النوع الثالث:
- رح تحتاجي فيه إلى فيزا ..

والنوع الرابع:
غالباً بتكوني الى حاجة موقع شحن يوفر لك خدمة personal shopping .. بمعنى انتي تحطي رابط القطعه اللي حابتها وتحددي الكمية واللون وهو يشتريها لك..

راح اشرح لكم طريقة عمل فيزا 
وطريقة عمل بريد وهمي
والشركات اللي توفر خدمة البيرسونال شوبينغ
وكل حاااجة حابين تعرفوها بالدروس الجايه ..
لكن الان راح انزل لكم روابط المواقع اللي شخصياً جربتها او ناويه اجربها مستقبلاً ..

amazon.com
aliexpress.com
nordstrom.com
jollychic.com
shein.com
vanilla.com
wadi.com
shy7lo.com
clubfactory.com
modanisa.com
sivii.com
ounass.com
vogacloset.com
wish.com
zaful.com
next.com
asos.com
mango.com
iherb.com
namshi.com

تجربتي مع منتجات أفــون ..~

مرحبا بنات ..

كيفكم؟؟؟ يارب تكونون كلكم بألف خير وصحة وسلآمة ..

اليوم جآيتكم بتدوينة جديدة عن منتجات وصلتني قبل فترة طويله ومع الأسف أنشغلت وما قدرت أني أنزل الريفيو عنها ..

اليوم باذن الله راح أكتب لكم تدوينه كآفيه وشآمله ووآفية بإذن الله عن جميع المنتجآت اللي وصلتني ..

المنتجآت كانت من شركة لها سمعتها من زمان مو تو ..

هي شركة أفون إللي كانت تعتمد على المندوبات في التسويق لمبيعاتهم من دون ما يكون لهم محل تاري ثابت أو موقع إلكتروني ..

فصاروا يشجعوا كثير من البنات أنهم يستفيدوا من وقت فراغهم ويشجعونهم على العمل في هذا المجال ..

أرسلوا لي قبل فترة تقريباً كذا منتج للتجربة يتنوعون ما بين منتجات ميك آب ومنتجات خاصة للشعر ومنتجات للعناية بالقدمين والبشرة والأظافر ووو ..

أول منتج جربته من وقت وصلني هو هذا السيروم ..

واللي هو عبارة عن سيروم لتعزيز الشباب وتأخير الشيخوخة ..

جربته أكثر من مره ولمدة يمكن قرابة الشهر في كل يوم مرتين صباح ومساء ..

ومع الأسف ما حسيته نآسبني وحسس لي بشرتي نوعاً ما لذلك أضطريت أني أوقف أستخدامه ..

ثاني منتج جربته كان عبارة عن مناكير جل باللون الأحمر الكلاسيكي ..

طبعاً أفون أنا قد جربت منهم المناكير هذا ..

وممممره كان يعجبني .. تركيبة المنتج جداً رهيبه ما أحسه يجفف الأظفر ويسبب تقصفه ..

ولا حسيته إللي يكتم الظفر بالعكس تركيبته خفيفه لكن اللون فيها جداً قوي ..

من طبقه وحده يكون اللون واضح ويغطي الأظفر بشكل ممتاز ..

فرشته برضو سهله في مد اللون لا هي اللي نحيفه ولا هي اللي عريضه مره تناسب جميع أحجام الأظافر ..

ثاني ميزه حبيتها مره في هالمناكير إنه بسرعه يجف يعتي ما يحوس لك الدنيا ..

وبرضو مو من النوع اللي بسرعه يتقشر أو يتقشر بسهوله بالعكس يبقى ثابت على وضعه لمدة 3 ايام تقريباً ..

جداً انصح في مناكيراتهم جودتها جداً رائعة ..

وفوق هذا مره رخيصه سعرها تقريباً 23 ريال للمناكير الواحد .. فناويه أخذ منهم كذا لون ..

المنتج الثالث اللي حبيته منهم اهو فاونديشن سائل اسمه true colour

الحلو فيه ان تغطيته مات انا غالباً أميل للفاونديشنز اللي تكون مات ..

ثاني شي تغطيته مره خفيفه وقابله للبناء يعني تقدري تحطي طبقتين فوق بعض من دون ما يكتل او يبين لك كيكي ..

كمان الحلو فيه أنه ثابت يعني أحطه من الصباح للعصر ويبقى زي ما هو لكن يدهن عندي على خفيف في مناطق التي زون عندي ..

برضو من الشغلات اللي حسستني انه جداً رهيب أنه يندمج مع البشره ويبين كأنها بشرتك الطبيعيه ما كأنك حاطه شي فيبين جداً طبيعي ..

لذلك مره حبيته لولا أنهم ارسلوا لي درجة شوي غلط ما حبيتها ..

كانت فاتحه علي بمقدار درجة إلى درجتين ..

بس مره انصح فيه .. وفي زيه تغطيته فيها قلو بس ما جربته ..

رابع منتج كان من ضمن البوكس اللي فيه المنتجات ..

هو هذا الكريم فاونديشن .. هو فاونديشن بس جاي على اثقل شوي وكريمي مش باودر ولا سايل ..

هالمنتج قد نزلت عنه ريفيو في الانستغرام ..

مو من المنتجات اللي اعجبتني بصراحه حسيت مظهره كيكي ع البشره ..

رغم انه خفيف يعتبر بالنسبه للفاونديشنز الكريمية الاخرى ..

لكن مع ذلك تغطيته ماكانت حلوه أبدا ..

كان يبقع ويبين المسام بوجهي 
مدري يبين كذا وجهي منقط.. 
واحس انه يكتم لي بشرتي فما حبيته ابداً ..

وأحس أي باودر ممكن ينحط عليه راح يخليه يكتل ..

حبيت ان لونه نفس لوني بالضضبط لكن ما حبيت تركيبته ..

المنتج الخامس

كان عبارة عن ميك اب ريموفر كريمي مرطب ..

جربته وما حبيته على بشرتي انا لان بشرتي مختلطه إلى دهنيه وما احب أحساس الكريم على وجهي ابداً ..

يمكن راح يناسب اللي بشرتها جافه إلى شديدة الجفاف أنصحكم فيه بقوه ..

من ناحية إزالته للميك اب فإزالته لميك اب الوجه أفضل من إزالته لميك اب العيون رغم انه مكتوب إنه مخصص لإزالة ميك اب العيون ..

شوي أحسه ثقيل على الرموش وممكن يسبب تساقطها فما انصح فيه للعين لكن للوجه ممكن للبشرة الجافه ..

المنتج السادس اللي ما جربته نهائياً ..

هو عباره عن شامبو جاف للشعر .. بمعنى لو كان شعرج دهني أو تتوهقين فيه بسرعه يدهن، هذا الشي راح يفيدج جداً .. لان بختين منه ع الشعر راح تسحب كل الدهون الموجوده فيه وتبينه نظيف ..

مع الأسف محدثتكم شعرها جداً جاف يعني نادرررررررررررررررر يدهن مره نادر .. وبالغلط يدهن ..

فلذلك ما سمحت لي الفرصه لتجربته ..

المنتج السابع .. وهو أكثر منتج عششششششقته عشق ..

هو كريم مرطب للقدمين، يا بنات أتعب أتعب أتعب أتعب أتعب وانا اقولكم ممتااااااااااااااااززززززز جداً ممتازززز ..

يرطب القدمين من قلب ويخفف من التشققات الموجوده فيها ..

أحب مره أستخدمه قبل النوم وقبل أطلع للجامعه مثلا أرطب به رجليني وألبس الجواريب وأستمتع بقدمين مترررطبه من قلب ..

جداً أنصحكم بهالمنتج يا بنات خورافي ..

المنتج الثامن كان عبارة عن مقشر للقدمين،

هو مقشر خفيف ولطيف مره ع الرجلين بريحة الفانيلا والتوت .. 

ريحته تدوووخ تجنن حق أسترخااااءء ..

المقشر خفيف يعني لا تتوقعون انه راح يقشر لكم تقشير عميق لكنه حلو كمقشر يومي لتجديد خلايا القدمين .. انا شخصياً حبيته وأحب أتدلع فيه ..

المنتج السابع كان عبارة عن سائل لنقع القدمين وتلطيفهم برضو نفس المقشر بريحة التوت والفانيلا ريحته تخليك تسسترخي غصب ..

ما جربته للأمانه لحد الآن .. ودايم أنساه .. لكني أحسه حق دلع وحق بدكير ومنكير جداً جميل ..

المنتج الثامن مكتوب عليه أنه زيت مساج ومتعدد الأستخدامات ..

بصراحه للان م عملت به مساج ههههه ..

لكن ما دام مكتوب عليه متعدد الأستخدامات صرت أستخدمه كزيت لإزالة الشمع من على الجسم بعد الحف هههههههههههههه ..

والله وخدمني صراحه ولا حسس لي بشرتي ولا شي ..

وبس هذي كانت كل المنتجات اللي ارسلوها لي شركة أفون ..
بس بصراحة ما حبيت شي واحد 
ان مو مكتوب ع المنتجات هي لايش ولايش تستخدم وكيف تستخدم الا القليل من المنتجات ..
وهذا عيبهم الوحيد
لكن اي شي ثاني بالعكس ممتاز جداً

مين فيكم جربت منها شيء وحبته ؟؟

تُركي: مسلسل الأزهآر الحزينــةة ~

مرررحبا عليكم بالتُركشش ..

كيفكم ؟ إزيكم؟ يآرب كلكو طيبين وكويسين ..

اليوم جآية لكم ب ريفيو عن ثآني مسلسل تركي تابعته ..

بصرآحة ... وبيني وبينكم!

هذا المسلسل وصلت يمكن للحلقة الخآمسة ووقفت ..

مآقدرت أكمل كلششش .. كلششش كلشش .. "(

ليه مآقدرت أكمله ؟؟

المسلسل حززززززييييننن يبككككي طول ما انا اتابع وانا اشهق بكى م يصير!!

وعارفين انتوا المسلسلات التركيه الحلقه على ساعتين ساعتين ونص كذا ..

ساعتين ونص متواصلين انا اجلس ابكي ليششش شالله حادني ؟؟ هههههههههههههههه

والله تأزمت نفسياً ما تحملت جد عاد "(

خلينا بالمسلسل الحين شرحته كله بالكلام اللي اول ..

نوع المسلسل: دراما، بكى، حزن، ضيقة صدر ههههههههههه ..

اذا ما خاب ظني المسلسل للآن يُعرض وله موسمين ..

قصة المسلسل: عن مجموعة بنات مراهقات بعضهم تربوا مع بعض في دار الايتام والبعض الاخر تعرفوا عليهم فيما بعد مع تسلسل الاحداث وتعرفوا هذي الفئة من الناس كيف يقابلهم المجتمع بغض النظر عن قصصهم الخاصة وقصة كل وحده فيهم ..

باختصار المسلسل موووووووووت كآبة يصلح للنفسيات يعني معلش ههههههههه ..

تقييمي للمسلسل : اعطيه 4 من 10 صراحه لانه اوفر كآبه ما اتحمل ابدا ههههه، مع ان لازم ولابد من المواقف الطريفه لكن الغالب عليه الحزن والكآبه ..

مين أكثر شخصية حبيتها ؟

مثل ما قلت انا ما تابعت المسلسل للنهايه .. لكن من خلال الحلقات اكثر شخصية حبيتها هي شخصة فريدة .. لانها تونس من جد احس شخصيتها هبله هههههههههههههه ..

يعني برايي لو خففوا حدة الحزن بالمسلسل اكثر يمكن كملت متابعته اما كذا ما قدرت اتحمل ..

اعطوني انتوا رايكم بالمسلسل ومين كملته للنهايه وحبته وتقييمكم له ؟

تُركي: مسلسل بنآت الشمس ..،

سسسسسسسلآم ع الشيخآت ..
كيفكم ؟ يارب تكونوا كلكم بخير وصحه ..

مسلسل اليوم مسلسل تركي كمان ..
أسم المسلسل:

بنآت الشمس
Güneşin Kızları

نوع المسلسل:
دراما، غموض نتتتفففه ..

قصة المسلسل:
المسلسل يتكلم عن 3 بنات وأمهم، البنات الثنتين الكبار توأم ومختلفتين تماماً بالشكل والشخصيه يعني توأم مختلف جداً، والثالثه اصغر منهم في عمر ال16 سنه ..عايشين لوحدهم في مدينة أزمير وأبوهم تركهم وهرب، الأم عاشت قصة حُب مع رجل أسطنبولي وقرروا على الزواج اللي رحبوا فيه البنت الصغرى ووحده من التوأم لكن الثانيه كانت رافضه تماماً الفكرة هذي والانتقال الى اسطنبول، لكن رغم ذلك الأم تزوجت وأرغموا على الانتقال الى اسطنبول وهناك انتقلوا الى بيت زوج الأم اللي كان يملك من الثروة والأموال الكثير وكان بيته عبارة عن قصر يسكن فيه هو وأخته وابنها وأبنه، ومن بعد نقلتهم الى اسطنبول بدأت الاحداث الكبيرة والمشاكل تتوالى عليهم واللي كان سببها الرئيسي زوج الأم .. عدد حلقات المسلسل 39 حلقة

رأيي بالمسلسل: 
مدري الكل قال ان المسلسل مسلسل مراهقات بس حبيته، صحيح عشت بفتره كلها كآبه هههههه مع انه مو اللي مره كئيب بس حبيت المسلسل، تمنيت لو كانت النهايه مختلفه شوي برأيي استعجلوا بنهايته، لكن برضو حلو ..

تقييمي للمسلسل : 
8 من 10 ..

أكثر شخصية حبيتها ؟

أكثر شخصية حبيتها كانت شخصية علي، قبل كل شيء لان صوته حلو ههههههه ، ثانياً حسيته هو اكثر واحد ابدع بالتمثيل ولا بقية ابطال المسلسل تمثيلهم جددددا سيء يمكن هو اكثر شخصيه اقنعتني وحبيتها بس .. 

مين تابعت المسلسل أيش رايكم فيه ؟

روآية: 1984 للكآتب جورج أورويل ||~

سسلآم جميلآتي..
كيفكم؟ يآرب تكونون بألف خير وصحة ..

إذا تذكرون قبل فترة تقريباً شهر نزلت عن مشترياتي من بوث " بوك تشينو " اللي كان في جامعة الملك فيصل ( كلية الزراعه )
وكان من بين هذي الكتب الروآية اللي راح أتكلم عنها اليوم ..

أسم الرواية: 
1984 

أسم المؤلف: 
جورج أورويل

لغة الرواية:
الأنجليزيه مُترجمة إلى العربية

نبذة عن الروايه:
الرواية كانت تتكلم بشكل عام عن أحد الأشخاص الذين يعيشون في دولة تابعه لحزب يحمل معتقدات تميل إلى الاشتراكية الأنجليزية
كانت الدوله تُقسم الناس بحسب طبقاتهم الاجتماعية الى 3 اقسام
عامة الشعب واعضاء الحزب الخارجي 
واعضاء الحزب الداخلي والذي كان ونستون بطل الروايه ينتمي إلى هذه الفئة
كانت الدولة تفرض عليهم انظمة حازمه وصارمة جاعلةً إياهم تحت مراقبة مستمرة في وقت العمل والنوم والأكل والشرب وفي جميع الأوقات كانوا يخضعون إلى مراقبه شديدة بالاضافة إلى محيهم لأحداث الماضي وتعديلهم المستمر وغيره من المسائل اللاعقلانية
ما جعل ونستون يضيق ذرعاً ويبدأ يبحث عن مخرج أو حل لجميع هذه الأمور

رأيي بالرواية:
الروايه جداً ممتعه جداً فيها عبر وفيها معاني جميلة ولكن نهايتها هي ما جعلتني نوعاً ما أفزع ما إذا كان العالم سيؤول إلى هذا المصير فعلاً !

أقتباسات أعجبتني:

" ... ترى ماهو مبرر وجود كلمة هي مجرد نقيض لأخرى؟ فكل كلمة تحمل نقيضها في نفسها. خذ مثلاَ كلمة ( جيد ) إذا كان لديك كلمة مثل ( جيد )، ماهي الحاجة إذن إلى كلمة مثل ( رديء )؟ إن كان لديك كلمة ( جيد ) تؤدي المعنى تماماً بل إنها أفضل لأنها تحمل المعنى المضاد تماماً، بينما لا تؤديه الأخرى بالتمام نفسه. ثم أيضاً إذا أردت تعبيرا أقوى لكلمة ( جيد )، ما فائدة أن يكون لديك كل هذه السلسلة من الكلمات الغامضة غير المجدية مثل ( ممتاز ) و ( رائع ) وماشاكلها؟ ألا تغطي كلمة ( جيد جداً ) المعنى، أو كلمة ( جيد جداً جداً ) إذا كنت ترغب في معنى أقوى ..."

" ... في النهاية سيكون مفهومنا للجودة والرداءة محكوماً كلية بست كلمات فحسب - أو في الواقع بكلمة واحدة .... "

" ألا ترى أن الغاية النهائية للغة الجديدة هي التضييق من آفاق التفكير؟ بحيث تصبح جريمة الفكر في نهاية المطاف جرماً مستحيل الوقوع فيه من الناحية النظرية، وذلك لأنه لن توجد كلمات يمكن للمرء من خلالها أن يرتكب هذه الجريمة. فكل مفهوم يحتاج إليه الناس سيتم التعبير عنه بكلمة واحدة محددة المعنى وغير قابلة للتأويل، أما معانيها الفرعية فيتم طمسها حتى تصبح طي النسيان... "

" ... الكلمات تتناقص عاماً بعد عام، كما يتضائل مدى الوعي والإدراك شيئاً فشيئاً ...."

" إذ ان ربع الراتب يجب اقتطاعه لسداد التبرّعات التي يعجز المرء عن احصائها "

" تمعن باستياء في الحياة التي يحياها. وتسائل أهكذا كانت الحياة دائماً؟ هل كان مذاق الطعام رديئاً كما هو الآن؟ "

" كان المرء يحس دائماً بأصوات احتجاج تنبعث من معدته ومن تحت جلده، ويشعر بأنه قد سُلب شيئاً كان من حقه الحصول عليه "

" إنني أفهم ( كيف ) لكن لا أدرك ( لماذا ) "

تقييمي للرواية:
10 \ 10 وبإمتيآز ..

مين فيكم قرأتهآ وأيش رأيكم فيهآ ؟

يوم من حيآتي: صبآح هادئ، ورحلة بحريّـة إلى العقير!

صبآح الخير، أو أقدر أقول عنه مسآء!

مآ أعرف هذآ الوقت تحديداً أحتآر فيه، يُقآل إنهآ السآعة 11 صبآحاً، لكن قبل قليل كآنت إقآمة صلآة الظهر واللي تعني بإن وقت الظهيرة حآن، ودخلنآ في المسآء ..

عموماً، لآ أحد يشغل عقله بأفكآري المعقدة هههههههه ..

اليوم كآن أحد أيآمي طمئنينة وهدوء، أحب الصبآح! ، لكني أكتشفت أني أحبه إذآ كنت سهرآنه أكثر من حبي له وقت أكون توي صآحية !!

صدق ليش مآتكون بدآية يومنآ هي نهآيته حقيقةً؟

أو ليش مآ تكون نهآية يومنآ هي منتصف اليوم..

ليش لازم يُحسب اليوم من بدآية شروق الشمس أو من الساعه 12 ص!؟

أحس بدآية أي يوم لآزم تكون مقرونة بالوقت اللي أي شخص يعيشه ..

يعني انآ الآن المفترض أني بآقي في يوم أمس، اللي هو الخميس في حين أننا علمياً في يوم الجمعة!

تحسون أني رجعت أخربط صح ؟

طيب أتركوا أفكاري ههههههههه اليوم أنا مبسووطة ..

تعلمت حآجة جديدة ..

تعلمت أرسم ..

يمكن ما أكون أتقنت الرسم 100% ، بآقي أنا في بدآية المشوار وتشهد علي هذي الرسمه هههههههههه ...

لكن مبسوطة إني على الأقل قدرت أرسم ، سآبقاً م كنت أعرف عن الرسم أي شي وخآصة عن رسم الوجوه والأبعآد وووو ...

على طاري رسم الوجوه، تعرفون ؟

برأيي أحس ضروري أي شخص يعرف يرسم وجوه الأشخآص ..

مآ أعرف أحس هذي الطريقه أحد التعبير عن المشآعر أيّاً كآنت ..

يعني أتخيلوآ مآ أحب شخصية وأرسمها بنفس النظرة إللي أنظر لهآ أنا ؟

وآآه ونآسه ههههههههههه شخصيّاً عندي مشكلة في التعبير عن عدم الأرتيآح لشخص، لأن ع الرغم إني ما أحب أخالطه بنفسس الوقت أخآف أجرحه ..!

فأحس لو تعلمت أرسم وجهه يمكن ع الأقل أطلع لو شوية من مشآعري هذي :/ م أعرف!

بنفس الوقت لو كنت أحب شخص !!

وجيت أرسمه بحسب نظرتي أنآ له، يآآآه أحلى شعور ..

لأن بقدر ما أنآ عندي عقدة في التعبير عن مشآعري للنآس إللي مآ أحبهم ..

مشكلتي أضعآف في التعبير عن مشآعر الحب بدآخلي ..

الكلمآت تختفي وتتبخر وما عاد أعرف أبوح فيها ..

عموماً، الرسمه لاحد يدقق فيها ترا هي نتاج تجربة أولى!

فمآهي بهذي السوء برأيي :/!! ههههههههههههه لآ تبآلغون "$

عموماً الهدف من وضعي للصورة قبل أني أوريكم، هي أني في المستقبل لو حصلت معجزة وأحترفت الرسم أشوف المقآرنه، حلو الوآحد يشوف نفسه كيف جآلس يتطور شوي شوي صح ولآ ؟ "$

أنتم بس لآ تدققون ع آلشعر ههههههههههههههههههه ..

قبل شوي قلت انه كان عبارة عن يوم هادئ مو ؟؟

ما امداني اكمل، الا جاء اخي العزيز الصغير بازعاجه وسؤاله المتكرر يلا متى طالعين للبحر ؟؟

اليوم كان مقرر اننا نطلع طلعة عائليه للبحر واللي مع الاسف بديتها بشيء ضيق خلقي

وخلاني طول الطريق للرحله دمعتي على خدي!

تدرون؟

انا من الناس اللي م تتحمل ابداً وأبداً رفعة الصوت والأسلوب الأستفزازي واسلوب الأمر والنهي من أيّ شخص 

وهذا ممكن يكون شوي عيب في بعض الاحيان

حتى ممكن مع الاسف ارد بوقاحة اذا ما اعجبني اسلوب الشخص معاي

بل وحتى اذا رفع صوته علي أرفع صوتي!!

لكن ما إن يرجع ليعتذر أحس اني فعليّا على خطأ ويساورني أحساس بالذنب كريه ينغص علي يومي ..!!

عموماً وصلنا للبحر اللي ما كان من الاماكن اللي ارتاح فيها فعليّاً ، حيث أني قبل هاليوم كنت ولازلت اعتبر البحر شئ خطر، ونذير شؤوم، وبحياتي ما وثقت فيه أبداً لدرجة من المستحيل أجلس ع الشاطئ لوحدي ..

لكن ولسبب ما بذاك اليوم لقيت نفسي اقرب منه، وحتى اني ولأول مره من سنوات فكرت أترك امواجه توصل لطرف رجلي، وحتى لأول مره بحياتي جربت أني أتأمله وأنظر له، 

ما أدري لكن حسيت أني أبي أرمي هالمره حملي عليه، حسيت بثقل بقلبي

انزاااح اول ما نظرت له وصرت قريبه منه ..

حتى مع تفاصيل الرحله السعيده ما حسيت بكمية الارتياح الا وقت رجعت البيت ..

ولأول مره احس أن وجهي تغير !!

تغير بعد زيارتي للبحر لأول مره ..

مدري بس حسيت شي بوجهي غريب، مدري هو من الراحه صرت اشوف وجهي نضِر، او من التخلص من جزء كبير من الاحساس بالذنب حسيت ان في حياة بوجهي !

او يمكن يكون من جو البحر اليوم، علماً إن الجو كان حاجة خورافية اليوم ..

حسيت ان الجو بهاليوم يواسيني ويآزرني، حتى بزخات المطر الخفيفه اللي طاحت علينا وحنا نتعشى ههههه ..

ومع كل صوت رعد حسيت اني اصرخ واطلع كل الطاقه السلبيه اللي بداخلي ..

ما اعرف، بس لأول مره أحس بنفع الطبيعه معي هههه ..

راح أترككم الآن مع بعض الصور اللي اخذتها ...

علماً إني ما طرحت الموضوع للفايده ابداً، ولكن شيء بداخلي دفعني للكتابه، فإن كنتي تحبي تقرأي شكراً لك من قلبي، حلو إحسآس إن أحد يسمع ويقرأ لك ..

 وإن مآ كنتي تحبي تقرأي،

فأنا هنا أكتب لنفسي ..

كتُب: مشتريآتي من بوث بوك تشينو، ونبذة عنهآ ღ

سسسسسلآم جميلآتي ،
كيفكم؟ يآرب تكونون بألف خير وصحة ..
اليوم كآن يوووم سعيد جداً 

من يوم الأحد حلَّ علينا ضيف في جامعتنا بكلية الزراعه ( كآن بووك تشينو )

هو عبارة عن موقع إلكتروني يوفر كتب وأكسسوارات قراءة وكل مآيخص القرآءة ...

الكتب اللي يوفرها الموقع جداً حماس أهم شي أنه يوفر كتب أفضل كآتبين عندي 

عبآس إبرآهيم ،

ومنذر قبآني ..

طبعاً الموقع يوصل للمنزل وأعتقد عندهم خآصية الدفع عند الأستلام مو متأكده لكن بإذن الله اول ما اعمل تجربة شراء للكتب راح اكتب لكم عن تجربتي في قسم ( التسوق من الأنترنت )

.

.

.

لكن اليوم، الكتب اللي أخترتهآ مآ كآنت لأي من الأثنين لإني تقريباً ختمت كتبهم ههههه ..

الكتب اللي أخترتهآ كآنت من أقترآحآت جُمآن صديقتي 

هي عبآرة عن روآيتين، 

الأولى كآنت:

 روآية 1984 لِ الكآتب جورج أورويل ..

هآلروآيه سمعت صديقتي الثآنية تقول أنها قرأتها بالنسخة الأنجليزيه لكن ما أكملتها وتحمست لهآ فحمستني عليهآ ..

ودي لو قرأتهآ باللغة الأنجليزيه، لأني ما أحب كثير أقرأ كتب مترجمه يمكن لو تلآحظون معي غآلباً الكتب إذآ تُرجمت تفتقد بعض المعآني، ومدري أحس تُفتقد روح الكآتب، أحب كل كتآب أقرأه بنفس لغته وهذآ عآمل مهم للي يحبون يطورون جآنب اللغه عندهم ..

عموماً السبب اللي خلآني أخذهآ بالعربي أن صديقتي قآلت لي إذا حآبه تبدأين بكتب أنجليزيه ما أنصحك تبدين فيهآ لأن لآبد تكون لغتك الأنجليزية أطور أكثر، فلذلك أستسلمت وقلت خلآص أقرأهآ بآلعربي مآ دآمي متحمسه عليهآ هههههه ..

نُبذة عن الروآيه ( مثلمآ كُتب خلف الغلآف ):

الروايه يعود إليها الكتّاب الذين يتحدثون عن الديكتاتورية والأنظمة الشمولية.

الروآيه صورت بطريقة تنبؤية، مجتمعاً شمولياً يخضع لديكتاتورية فئة تحكم بأسم " الأخ الكبير " الذي يمثل الحزب الحاكم، ويبني سلطته على القمع والتعذيب وتزوير الوقائع والتاريخ، باسم الدفاع عن الوطن والبروليتاريا. حزب يحصي على الناس أنفاسهم ويحوّل العلاقات الانسانية والحب والزواج والعمل والأسرة وتخضعهم لنظام واحد، لا ينطبق على مسؤولي الحزب.

أحس أني راح أحب الروايه هذي، للآن بدأته وقرأت تقريباً نصف الفصل الأول وحسيت بحماس لإكمال القراءة رغم أني مو كثير حبيت الوصف الدقيق والكثير ذكرني برواية دافنشي لدان براون الوصف فيها كان مقيت :"(

سعر هذي الرواية بالموقع: 38 ريال

.

.

الروآيط الثآنية كآنة :

روآية ريآح هجر لِ الكآتب أسآمة المسلم ..

الروآية صنفت كونهآ روآية رعب وهذآ أكثر شي حمسني عليهآ ومآدري ليه حسيتهآ يمكن تكون قريبة من روآيآت عبآس إبرآهيم ( زي حوجن مثلاً ) ههههه ..

طبعاً هذي الروآية هي الجزء الثآلث من سلسلة روآيآت ..

الأولى: بسآتين عربستآن ..

الثآنية: عصبة شيآطين ..

الثآلثة: ريآح هجر ..

لأصدقكم القول، مآ قرأت ولآ وحده فيهم هههههههه ..

أشتريت روآية ريآح هجر لأن جُمآن صديقة القرآءه عندهآ أول جزئين ، ف أنآ رآح أستعير من مكتبتهآ وهي رآح تستعير من مكتبتي .. 

نبذة عن الروآية:

برضو لأصدقكم القول مآعندي أي فكرة حولهآ .. 

واللي مكتوب خلف الغلآف فقط جملة وآحدة 

" الحر لآيموت إلآ حراً ..

نآفجة بنت أملج "

يعني حتى النبذة غموض وشكلهآ تخرع

.
.
.

وآخررر شي أشتريته كآن، هذآ الكوب اللطيف حبيته وحبيت لونه أنآ من عشآق اللون الأبيض في الموآعين والأثآث هههههه، لطييف مره حبيت أني أخذه أشرب فيه حليب ههههههههه، ولمن يجهز مكتبي بإذن الله رآح أحطه ع المكتب وأحط عليه أقلآمي 

هو بدآية من دآخل مكتوب عليه عبآرة لطيفة :

" السعآدة أن تنسى العالم لأنك ....

تقرأ "

ومن برآ مكتوب شعآرهم " أمة أقرأ تقرأ "
.
.

إن شآء الله أول ما أقرأهم رآح أنزل هنآ في قسم ( رفيقك كتآب ) رأيي بكل روآية وأفصلهآ تفصيل تآم بإذن الله ..

في أحد تحمس لوحده فيهم ؟